ՀՀ ՊԵԿ նախագահ Գագիկ Խաչատրյանի մասնակցությամբ բացվել է Արաբկիրի հարկ վճարողների սպասարկման կենտրոնը: Համակարգի ղեկավարը ծանոթացել է նորաբաց կենտրոնի պայմաններին, զրուցել աշխատակիցների հետ, լսել հարկ վճարողների դիտողություններն ու առաջարկները:
Հաշվետվությունների լրացման և էլեկտրոնային եղանակով ուղարկելու հետ կապված հարցերում աջակցություն, հաշվետվություններն էլեկտրոնային եղանակով հարկային մարմին ներկայացնելու համար պայմանագրի կնքում, էլեկտրոնային ծածկագրի և գաղտնաբառի տրամադրում և մի շարք այլ ծառայությունների մատուցում, որ առաջարկվում է հարկ վճարողների սպասարկման կենտրոնում:
ՀՀ ՊԵԿ նախագահի առաջին տեղակալ Կարինե Մինասյանը տեղեկացրել է, որ սպասարկման կենտրոններում հարկ վճարողը կարող է ստանալ հարկային համակարգին առնչվող ցանկացած բնույթի լիարժեք և սպառիչ տեղեկատվություն. «Այս կենտրոններում հարկատուն հնարավորություն ունի տեղեկանալ հարկային օրենսդրության և հարկային հարաբերությունները կարգավորող իրավական ակտերի հիմնական դրույթներին և դրանց պարզաբանումներին, հանգամանալի տեղեկատվություն ստանալ հաշվետվություններն էլեկտրոնային եղանակով ուղարկելու կարգի, կենսաթոշակային բարեփոխումների ծրագրի շրջանակներում միասնական հարկի ներդրման վերաբերյալ: Հարկ վճարողների սպասարկման կենտրոնն էապես կթեթևացնի նաև նորաստեղծ հակատուի գործը` վերջինիս հնարավորություն տալով հարկային տեղեկատվություն և աջակցություն ստանալ հենց իր աշխատավայրում»:
Կոմիտեի նախագահի առաջին տեղակալը մատնանշել է սպասարկման կենտրոնների հիմնական նպատակները. «Հարկատուներին որակյալ ծառայություններ մատուցելով` մենք փորձում ենք խթանել հարկ վճարողի կողմից հարկերի կամավոր վճարումը, բարձրացնել մեր հարկատուների ինքնագնահատման մակարդակը և, իհարկե, կրճատել ՊԵԿ-ի կողմից կատարվող ծախսերը: Բացի այդ, նաև նպատակ ունենք այսպիսով տարանջատել սպասարկման գործառույթները վերահսկողականից»:
Ժամանակակից սպասարկման կենտրոնները հագեցած են որակյալ ծառայություն մատուցելու համար անհրաժեշտ գույքային պայմաններով, համակարգչային տեխնիկայով, բարձրակարգ և վերապատրաստված մասնագետներով:
Սպասարկման կենտրոններում տեղադրված է նաև տերմինալ` որոշ ծառայություններից ինքանսպասարկման սկզբունքով օգտվելու համար: Կենտրոնի կողմից մատուցվող ծառայություններից հարկ վճարողը կարող է օգտվել տարբեր եղանակներով` այցելելով, զանգահարելով, էլեկտրոնային փոստի /նաև փոստի/ և ֆաքսի միջոցով:
Տեղեկացնենք, որ սպասարկման կենտրոնի ծառայություններից կարող են օգտվել բոլոր ցանկացողները` անվճար: Պահպանվում է նաև հարկատուի վերաբերյալ տեղեկատվության գաղտնիությունը:
Այսպիսով հարկ վճարողների սպասարկման բարելավումը և իրազեկվածության առավել բարձր մակարդակի ապահովումը ՊԵԿ առաջնահերթ խնդիրներից է: Կոմիտեն նպատակ ունի առավելագույնս ընդլայնել հարկ վճարողներին մատուցվող ծառայությունների շրջանակը: Ընդ որում, պետեկամուտների կոմիտեն առաջնահերթ է համարում սպասարկման կենտրոնների ստեղծումը նաև մարզերում. այս տարվա ընթացքում այսպիսի կենտրոններ կբացվեն հարկ վճարողների խտության տեսանկյունից խոշոր շրջաններում: Կ.Մինասյանի տվյալներով, խոշոր սպասարկման կենտրոններ կբացվեն Վանաձորում, Գյումրիում, Կապանում և Հրազդանում: Համապատասխան աշխատանքներն արդեն սկսվել են:
Հարկ վճարողների արագ և որակյալ սպասարկումն իրականացվելու է վերապատրաստված, որակյալ մասնագետների, տեղեկատվական նոր տեխնոլոգիաների առկայությամբ:
Այսպիսի կենտրոնների բացումն աննախադեպ քայլ է համարում պետական եկամուտների կոմիտեի տեղեկատվական տեխնոլոգիաների վարչության պետ Միքայել Փաշայանը` հարկ վճարողների սպասարկման որակի բարձրացման, էլեկտրոնային եղանակով հաշվետվությունների ներկայացման և, առհասարակ, մեր երկրում էլեկտրոնային կառավարման զարգացման տեսակետից: «Միանշանակ կարող եմ փաստել, որ նման սպասարկման կենտրոնները բնորոշ են զարգացած երկրներին: Արդյունքում մեր հարկ վճարողներն այսօր լիարժեք տեղեկացված են ամբողջ իրավական, հարկային դաշտից»:
Կոմիտեի մասնագետները փաստում են, որ այս ուղղությամբ տարվող աշխատանքները շարունակական են, քանի որ պետեկամուտների կոմիտեում գիտակցում են` ապագան էլեկտրոնայինինն է:
